RSS

أرشيف التصنيف: زجل سوري

ستي كانت بكوانين(زجل سوري)

 

 

 

ستي كانت  بِكْوَانيـن

تقعُـد قـدام المنقـلْ

وإحنا متـل الزغاليـل

حولا بسهرتنا الأجمـلْ

ساعـة بتغنِ غْنانـي

وعاألحانـا منتمـايـل

وساعة بتبلش  تحكـي

حكايي فيهـا بتدلـل

وإحنـا منقـلا يـالله

بدنا الحكايـي تِكْمَـلْ

بتقول جيبوا كاسة  مَيّ

حتى  حلقـي  يتْبَلـل

نشَّفتو ريقـي يا زغـار

حللوا عني راح  إزعـلْ

منبوِّسْ إيديهـا شوي

بترجع تحكي من الأول

ومامنتركها حتى تنـام

وراسا عا صِدرا مدلدلْ


شعر
زاهية بنت البحر

عرض الشرائح هذا يتطلب تفعيل جافاسكربت.

 

 
5 تعليقات

Posted by على مايو 14, 2010 in زجل سوري

 

شمس لاتغيب(زجل سوري) أمي: لك قلبي

 
 

 

إمِّي بزمانــــــا كانِتِ ابْتِكْتُبْ شِعِرْ
وبتشكِّلِ الكلمــــــات بورود وزَهِرْ
وماكِنتْ بعرِفْ يومِتا إنِّي أنــــــــا
راح كونْ متلا زاهية بنت البحــرْ
إمِّي اللي قلبا كبيرْ بوسع المــــدى
مابتشبها بين النِّسا منهن حـــــــدا
منها اتعلمتِ المشي بدربِ الهدى
ومنها ورثتِ الحكمي ببحور الشعر
إمِّي ضيا أنوارا مابتعرفِ غْيابْ
مشعشعْ بقلبي حروفْ عم تغزل كتابْ
إسمي أخدتو من سناها عالحساب
وراح ضلّ وفِّي بْحقُّو عاطولِ العمرْ

 

 

شعر
زاهية بنت البحر
 
 
 
 
 
 
46 تعليقات

Posted by على مايو 14, 2010 in زجل سوري

 

بالعهد راح وفيّ

 

 

 

 

بفتحْ بشوقي  مخـزنِ  الأيـامْ

وبقرا عامَهْلي  كتابْها  بْلهفـي

بتصفحا بوَجْدِ وْحِزِنْ  ودموعْ

كلا سوا نِتفي ورا نِتفي

بين السطر والسطر فيه  أشياءْ

عليي عزيزي  وللشفا  وصْفـِي

فيها حيـاة ملوَنـي بالحـُبّْ

وفيها هموم موجِّعَـا  كِتفـي

وحتى الفواصل والنقط  بيضَلْ

شكلا حلو ومزَهزَها  الوَقفـي

فيها حكي عن كانِ ياماكـانْ

وفيها أغاني ورقـصْ بالزَّفِّـي

وفيها صلاةِ وسهرْ حتى الصبحْ

ياريتا لنَّا تـرفِّ شـي رفـِّي

وفيها دفا بيقتلْ  بَرِدْ  كانـون

بصحبةْ أهلْ بالصدقِ  متِّصفي

أمـي وأبي..إختـي  وأخـي، وأحبابْ

ورفقات حولي بـودِ ملتفـي

ولك يازمان ارجاع لنّْو  نْهـارْ

خليني إلمس وجْهُـنِ  بكفِّـي

مشتاقِ قلبي للقـا  وياريـتْ

توصِّلْ سلامي لعندُنِ  بلهفـي

وقلُّنْ أنا راح  كمِّلِ  المشـوارْ

بهيدي الدني، وبالعهد راح أُوْفي  

شعر 

زاهية بنت البحر

عرض الشرائح هذا يتطلب تفعيل جافاسكربت.

الحقوق محفوظة

 

 

 

 

 

 
7 تعليقات

Posted by على أبريل 23, 2010 in زجل سوري

 

وردات لأمي

 

 

عَمْ جمِّع أحلى  ورداتِ
الدنيا وأعملهـــــــــا ضمـِّـــي

وأكتبْ أحلــــــــــى الغنيَّـــاتْ
وأدِّمهـا بعيـدك يامـــــــــــِّـي

****
يامـــــــِّي المعنى فيـكِ بيكبـرْ
إنتِ الأرض وإنتِ العسكــــرْ

وإنتِ العَلـَم العَمْ بيرفْــــرِفْ
والقمــــــــــحِ بغـلاتِ البيـدرْ

****

إمــــــــي يا ستِّ الغوالي

باأغلى من روحي ومالي

منفديــــــــــــكِ بالـدَّمِ الغالـي
وشوماطلبتِــي منــَّا بيحضَـرْ

 

**** 

بوجودك أكرمنــــــا الرَّب
وفيكِ نَوَّرْ لينـــــــا الدَّربْ

وأنت الحب وأنتِ القلب
الليلية علينا عم يسهر

شعر
زاهية بنت البحر

 

 

 
2 تعليقات

Posted by على أبريل 20, 2010 in زجل سوري

 

ولك روح دوِّرْ بالدِّني

بكيتُ وهي تروي لي قصة ابنها العاق الذي تنكر لها
واستحلَّفتني بالله أن أكتب لها قصيدة فكانت هذه
:
الصورة
 

ولك روح دور بالدني
بحاراتها ، وبيوتها
جواتها وبراتها عن شي قلب
بيدق باللحظة كذا دقة
لمَّا بإسمك بشلحو مو فارقة
بالفكر كانت شلحتو
أو عاالسطر بكتاب أو ورقة
قلبي أنا بكل الدني
مالو مثيل بدقته
بالفرح كانت أو حزن
أو بالغضب أو حتى بالحرقة
مابين قلبك وقلبي الفرق يانور عيني كبير
لوجيت تحسب نِسْبتو
مافيك تعرفْ مهما كنت كبير
مهما ترقِّتْ حسبتك
بتضل قدام اللي وحدا بتعرفك
وبتفهك يابعد عمري زغير
فينا القرابه مجسَّدي بالدم
وبالشكل
والأنسابْ
وفينا العوافي غامرة الأصحابْ
لكن ياروحي الما وجدتو بينَّا
هادا اللي إسمو الحرص عا الأحبابْ
ولك روح فتِّش بالدني واسآل كل الناس
أي القلوب الصادقة بمحبتا
والما إلا وسواسْ؟
بتعرف ياروحي إنو قلب الإم هوي غير شِكِلْ
والشاغِلو بحب الولد أعظم شِغِلْ
مابيعرف الغش اللي غيرو بيتبعو
ولو حاوَلوا يغروه بجبال الدهب والماس.
الفرقة يابني مش بُعد وحدود
الفرقة أصعب بالحضورِ إن كان فيها اصْدود
لكن بقى راح قلك الأصعبْ من الفرقة
ومن كلِّ حرقات البعدْ
لما تلاقى الإم من إبنا يا بعدي اجْحود.

شعر

زاهية بنت البحر


  

 
 
6 تعليقات

Posted by على أبريل 20, 2010 in زجل سوري

 

حلم طفلة زغيرة

وقفِتْ عَ شباكِ الزَّمَنْ واسترْجَعِتْ
أحلى الصور هلْ عاشِتا بعمرا
ومدري
شو خلاها بسرَّا استعْجَلِتْ
وشلْحِتْ عيونا ع البحرْ نظرا
واتلهفِتْ وإيديها
عمْ تِمْتـَدْ
تلملمْ من هبوبِ الهوا صِرَّا
واتسَابـِقْ النـْظراتْ بعيونِ الزَّمنِ
هالْ صادَفِتـْها اليومْ بالقدرا
أتاري لمْحِتْ شجره حدَّوْ
عَرَّشِتْ
بغصونِها وأوراقـْها وزهرا
وإيدينِ عمْ تِسْقِيْ ورودْ
الدَّارْ
بمحبِّتا وإيمانْها وصبرا
حَسِّتِ عاخدا دمعا فيها اتذكَرِتْ

إيدينْ إمَّاوبسْمِتا وسِحرا
قلبا انفطرْ واتـْسارعوا الدَّقات ْ
ركضوا
عاإمّا يبوِّسوا شعرا
وطيورْ أغلى دارْ صدحت بالنَّغَمْ
فوق الزُّهورْ الـْ
فوَّحتْ عِطرا
والإمْ عم تطَّلَّعْ وتسألْ
مستغربي شوجدّْ عا فَجرا
لكنْ
بإحساسِ الأمومي اتفهمتْ
واتبسمِّتْ شمسْ الضُّحى بثغرا
وعينيها راحتْ
بالومَا تنده :تعي
يابنيتي طوَّلتي هالسَّفرا
يابنيِّتي شوفي الوردْ
مجروحْ
وعا خدودو يامِّي انطفيتْ الجمرا
يابنيِّتي ماعادْ عندي
دموعْ
تصَبِّرْ عذابي ولوعتي الحرَّا
بلحظةْ عتبْ هالقلبْ رفِّ
وطارْ
وقلَّـلا ياإمي راجعه بكرا
تانجددِ الأحلامْ بِعيونِ الفرح
ونعشِّقا
بالحبّْ والعِشرا
وحَ ندوِّبِ سنينِ البُعد بالكاسْ
وراح نشربا سكَّر
بلاحسرا
وهـالإم ضهرا منحني
والعمر إلها بينحني
والبنتْ زهرةْ
سوسنيْ
رجعتْ لإمَّا بحلمْ طِفلي زغيَّرا

شعر
زاهية بنت البحر

يكفيكم فخراً فأحمد منكم***وكفى به نسباً لعزِّ المؤمن

 
10 تعليقات

Posted by على أبريل 20, 2010 in زجل سوري

 

ياقمر ماتروح بعيد

 

سوسن

ياقمر ماتروح بعيد
طوال الليلْ أنواركْ زيدْ
بدي غنيلك غنية
وبهدوءك ردد وعيد
***
ياقمر قلبي مشتاقْ
العمر ببعدن مابينطاق
غرَّقني دمع الأشواق
رجعهن بليلة عيد
***
أمي وبيي وإختي وخيي
عافراقن سهروا عينيي
ناديتن..ماردوا عليي
أنا متلك ياقمري وحيد
***
اغمرني بنورك أوعا تفل
عوضني عن حب الكل
راح اهديلك ورد وفل
واكتبلك أحلى القصيد
***
إنت خَيِّيِ وأنا أختك
يابختي فيك ويابختك
ارجع ياخيي مسامحتك
خلينا نبدا من جديد  

شعر

زاهية بنت البحر

الحقوق محفوظة


 

 

 
أضف تعليقا

Posted by على أبريل 20, 2010 in زجل سوري

 

ولَكْ روح حاجي ادق عابوابي

نقره لعرض الصورة في صفحة مستقلة

 

نقره لعرض الصورة في صفحة مستقلة

 

ولك روح حاجي ادِّق ع بوابـي

مابخاف منَّـكْ عنـدي أحبابـي

ولادي الزغاربيعرفـوا يشيلـوا

رشـاش فيـه النـار لهَّـابـي

مابخاف منـك حتـى البنيـات

قلبنْ قوي وإيديهنْ  رصاصـاتْ

عوينْ جاي  رجِّـع  الخطـواتْ

قبـلْ القبـر ماتفتحـوا نيابـي

ماتفتكر إنو النسا ببلادنا مساكين

ولك روح إسأل عنهن تشاريـن

بتعرف بأنو البنـت بالعشريـن

بتحرس لوحدا كـل  هالغابـي

ولك روح هاجر بالزمن  مكسور

حاتضل عا طول المدى  مقهـور

ماعدنا نحمـل طبـل أو زمـور

حملنا السلاح وعليـو  العتابـي

 نقره لعرض الصورة في صفحة مستقلة

 

ح انضل إحنا للمجد عنوانْ

مهما يباعد  بينَّا  النسيـانْ

مادام فينا القلب  بالإيمـانْ

مشرَّع بوابو لْكلّْ أحبابـي

نقره لعرض الصورة في صفحة مستقلة 

هادا زمان البـؤسْ والأحـزان

والناس ضاعوا وفلَّتوا البستـانْ

وعشش على سياجو غراب البين

والأهل صاروا وحوش بالغابـي

شعر

زاهية بنت البحر

 

 
2 تعليقات

Posted by على أبريل 7, 2010 in زجل سوري

 

عمري الحقيقي

تستطيع أن ترى الصورة بحجمها الطبيعي بعد الضغط عليها

بِكـْتـُبْ قِصَصْ

بِرسُمْ صًوَرْ مِنْ هالدِّني

وبْعَـلـِّـقـَا بقلبْ الزّمنْ

وبصَحِّـفا

بخليِّها تبكي بالدّمعْ مرَّة

وفرحْ مرَّاتْ ياما كنتْ ضوِّيْ متحَـفا

لـَك ياشِعِرْ

عمريْ الحقيقي بملعَبَكْ

وبراتو مابحسِّ الدِّني فيها وفا

خلقنا سوا

ربينا سوا

والدَّمعه بينْ النَّاس كنا نجفـِّفا

وبيناتنا عاش الهوى بصدق وحنانْ

ربينا ع شطِّ البحر

واشربنا الصَّـفا

ورَح ضلّْ أكتبْ حتَّى يخلُصْ هالعمرْ

وبعدي أنا بتبكي القصايدْ مغرِفا

لـَكْ ياشعرٍ

كلِّ الحقيقةْ يَللي إنتَ بتعرِفا

ربِّ القدرْ هويِّ اللي صاغا وصرَّفا

تعمـْشـَقِتْ طفله زغيره بدي طالها

واكبرت لمَّا وصلْتْ بدي اقطِفا

بقطفْ

مابقطفْ

شوبقي من هالعمرْ

كم ساعة حلوي بسْ فيه بعدا الجفا

لـَكْ وينْ بدِي فِلْ من حبَّك أنا

وبعرِف بإنه الرَّب ْ هويِّ اللي اصطفى

وهالموس ع الحدَّين رَحْ يضرب خَلاص

شو قولتك معقولْ يضرب بالخفا؟

تعـَلـَّمِتْ إنّو الدّنيا ماإلها أمانْ

وماني زغِيره حتَّى عيني إطرفا

لكن اذا حَسَّيَتْ إنو الموجْ سارقني

رَحْ إمْسُكِ الدَّفه ولعندك إحرفا

لـَكْ ياشعر

اجبلني بكلماتِ الفرحْ

شو بخافْ من ليلِ البردْ بعدِ الدَّفا

طيِّرْني فوقِ الرِّيحْ

فوق ْالغيمْ

فوق ِبلادْ مافيها ثواني إضْعـَفا

بدي إيديكْ اطــَّال نجماتِ السَّما

تقطِّفْ قناديلا وعَ كتبي تصفـِّـفـا

وتشلحْني من نجمه على نجمه

وترجع ْإلي عشقانْ

ع ولفو لفا

شعر

زاهية بنت البحر

 تستطيع أن ترى الصورة بحجمها الطبيعي بعد الضغط عليها

 
14 تعليقات

Posted by على أبريل 6, 2010 in زجل سوري

 
 
Follow

Get every new post delivered to your Inbox.

Join 152 other followers